«Егер әйелдің (бала емізетін ананың) емшегі кішкентай болса, баласын тойдырып емізе алмайды. Өйткені емшегі кішкентай анадан аз сүт бөлінеді» деген түсініктің бар екендігі белгілі. Оны аңыз десек те болады. Себебі әйел омырауынан бөлінетін сүт пен сүттің сапасы емшектің үлкен немесе кіші болуына байланысты емес.
Әйелдің емшегінің басым бөлігі май ұлпаларынан тұрады. Ұлпалардың көлемі емшектің көлемін береді. Ал сүттің жасалуына жауапты мүшелер — сүт бездері. Емшекте орналасқан бұл бездер бала туылғаннан бастап емізу кезеңінде сүт бөліп отырады. Сүттің мөлшері осы бездердің қызметіне және емшек еметін сәбидің сұранысына тікелей байланысты.
Емшектегі сәби анасының бойындағы (емшегіндегі) сүтті көп емсе, сүт бездері де көп сүт бөледі. Сол сияқты, егер аз емсе, сүт аз мөлшерде бөлінеді. Бірақ анасының денсаулық жағдайы мен көңіл-күйіне қарай сүттің бөлінуі өзгеріп кететін жағдайлар да жоқ емес. Мысалы, стресте жүрген ананың сүт бездері аз сүт бөлуі ықтимал.
Ұқсас мақалалар
Сәбиді емізу барысында кездесетін қиындықтар
Емшектен сүт емудің жақ сүйекке пайдасы
